''HA- HA - HA- Ullasa - Vishada'' by Nadeeka Bandara.

interview with Indian James Joyce- Charu Nivedita

තොටලඟ ද්‍රෙෘපදිය

ක්‍රිෂ්ණා දෙවිඳුන් නාවාට
එක් පසෙකින් ලිහෙනා සළු පට
මවමින අනෙක් පසිනා ඉඟ වට
නිරුවත වසන්නට තොටලඟට
හැත්තෑපහේ වත්තට,
ද්‍රෙෘපදී
නොතැවෙන්න
ක්‍රිෂ්ණා මිය ගිහින් වෙන්නත් පුලුවන්
නැතොත් මෙහි ඉපදී නැති වෙන්නත් පුලුවන් තවම

හින්නිහාමිය නුඹ
බැද්දේගමේ ගම්මුන්ගෙන්
නිරුවත් වුණ
උන්ගේ ගල්මුල් පහර කෑ.
මායාකාරියය නුඹ පුනරුද යුගයේ...

ද්‍රෙෘපදී 
දුර්යෝධනලා ගොඩයි ද්‍රෙෘපදී
තුන් කල්හිම
සකල දෙස්හිම
දුර්දාන්ත පාලකයෝ මතු නොව
දුර්ජන දනන් අතරේ
දුර්යෝධනීලාද බෝමයි.
ශිෂ්ටාචාරයේ සළුව මවන්නට
අනවරතව
වසන්නට නුඹේ සෙළුව
අසමත්ය අප ක්‍රිෂ්ණා සේ

නොදනිමි
බොහෝ උන් කියන ලෙද
නුඹම නිරුවත් වීදැයි
පෙන්වන්නට අපගේ හෙලුව
ගලවා ඇන්ද සළුව
කැඩපතක් කොට නුඹේ නිරුවත

වසංගත කාලය එළඹුණු හාම 
වසත් සමයේ මෝවිට
කුරිරු රංගය ආටෝගේ
ගෙනාවා නුඹ පොළොවට 
දිවමන් රංගයක් විලසින.
පැණි අමුඩෙටත් නොවටින
භරතගේ නාට්‍ය සාස්ත්‍රය
කුණු කාණුවේ තොටලඟ.
ව්‍යවස්ථාව රෝල් කොට
ගසාගෙන උතුමග
ඇද ඇද කියෙව්වා නුඹ
කැරලි ෂ්නීමන් මෙන්
අභිවහන රංගයක් විලසින 
ඇසුණේ නැතත් කිසිවකුට
දුටුයේ නැතත් කිසිවකු නුඹ වට.

ද්‍රෙෘපදී...
සිරිලක පතළ දවසින
තොටලඟ ද්‍රෙෘපදී,
ශිෂ්ටාචාරයේ සළුව වියා නැත තවම
නුඹේ නොව අපේ හෙලුව වසා ගන්නට.
කපු කටින්නට කෙනෙකුන් නැතිව
චරකය දිරා ගොස් තම්මැන්නා නුවර.
කුවේණිගේ දිවිfදා්සය එනවා අප පසුපස
නයි මුවේ විස දුමින්
අහීවාතක වසංගතය විලසින
කොළ කෑ සායකුත් එන මුත් අත ළඟ
තණකොළ මිසක් කිසිත් නෑ අත ළඟ.
සේද මාවතේ ආ දළඹුවෝ
අන්න කුවේණිගෙ චරකය ළඟ.
මකර මුවින් එන ගිනිදළු ඇවිලේ
බුර බුරා පිඹිනා දුම් රොටු මැද
ලිලිත්ගේද කුවණ්ණාගේද සාපය මැද.

ද්‍රෙෘපදී
ක්‍රිෂ්ණා මැවුවද
ලිහෙනා සළුව තොරක් නැතුව
පල නැත
හෙලුව ඇත්තේ උන්ගේ ඇස්වලම කොට.

නුඹ මාධවිය විය හැක
එහෙත් රෙද්දෙ තුත්තිරි පිරුණ
හිතේ තුත්තිරි යාය පැතිරුණ
වේසියෙක් වෙන්නවත් ගටක් නැති
මේ වෙන්ඩ පත්තිනිලාට
ජයගොස නගන නුඹ වටා
මායාකාරියන් ගිනි තැබූ විට නැගූ
ගැහැනු ජය ගොස සේම
කඩා වම් තනය ගෙන
ගසා මදුරාපුරට
ගිනි තබන්නට නොහැක.

රෙද්ද පහළට දැම්ම
විටදි උන් යසෝදරා
රෙදි කච්චියක් ඇන්දත්
නුඹ වේ පටාචාරා

ක්‍රිෂ්ණ දෙවියන් විලස
රෑ සිහිනයෙන් අවුදින
අන්දවන්නම් මම නුඹට
ශිෂ්ටාචාරයේ මායා සළුව,
පවු ගෙවන පවු කරන පවුකාර පවුල්වල
ගෙවල ජීවිත ගෙවන සෙවල පිරි ගෙවල්වල
වියන මායා සළුව,
සිත නිවේ නම් නුඹේ
ඒ සීතාම්බර පටින

ද්‍රෙෘපදිය සිරිලකේ
හැත්තෑපහේ වත්තේ
තොටලඟ කාණු පල්ලේ
දණ නමමි මම නුඹට
දණ ගසා වඳිමි මම
සිප ගනිමි ඔය දෙපා
ගල් ගසා බින්දාට
ශිෂ්ටාචාරයේ කැඩපත
දෙදහස් පන්සිය වසක් ඉපැරණි,
නුඹ හෙලුව කැඩපතක් කොට
පෙන්වූවාට අප හෙලුව

-කේ. කේ. සමන් කුමාර

කේ. කේ. සමන් කුමාරගේ 'ඇගෙ නම රතී'

Sapio sexual erotic poetry collection with crazy wisdom & emotional intelligence

සරස්වතී 

කලාවේ සදා සරණාගතී

ඥාණයෙන් බඩ නොපිරේ යැයි කී 

ලක්ෂ්මිය වඳින්නට යන උන්ට

ඇස් ඉස් මස් ලේ දන් දුන් 

සරණාගතී

ලක්ෂ්මී දෙවොල මුල

ජගන් මෝහිනී ඔබමය

මධුර භාෂණය රුදු වුණ

චාරු දේහිනී රළු වුණ

කමල වාචිනී මැල වුණ

සරස්වතී දේවී වන්දේ සරස්වතී දේවී

කේ. කේ. සමන් කුමා­රගේ නව­තම කාව්‍ය සංග්‍ර­හය “ඇගෙ නම රතී”නමින් දැන් නිකුත් වී තිබේ. ‘නගා මැරූ අල’, ‘කවි නැවත් කොළ­ඹට’, ‘මගේ පුංචි මාතා­හාරි’, ‘ඉතිරි බිතිරි’ යන කාව්‍ය සංග්‍ර­හ­යන් මීට පෙර පළ කොට ඇති ප්‍රවීණ ලේඛ­ක­යකු, විචා­ර­ක­යකු, පරි­ව­ර්ත­ක­යකු මෙන්ම ජන­මා­ධ්‍ය­වේ­දි­යකු ද වන කේ. කේ. සමන් කුමා­රගේ පස් වන කාව්‍ය සංග්‍ර­හය වන මෙය ශෘංගා­රා­ත්මක කවි එක­තු­වකි.

මේ බෙට්ටෙ කොයි කොණත් ගඳයි.

එස්තර ඉරිදා බිත්තර පාට කළ
පුංචි කෙල්ලක
බිත්තරයක් සේම පොඩිවී
ගලා ගියා ලේ
කොච්චිකඩෙන් මීගමුවට
මඩකලපුවට
රට පුරාම

කුරුසිය මත යේසුස් වේදනාවෙන් තෙපලුවා

“ඒලී ඒලී ලාමා සබක්තානී”

අහෝ දෙවිඳුනි ඔබ මා අත් හැරියේ මක්නිසාද?

කන්‍යා මරියතුමියද
මරියා මග්දලේනාද
බිත්තර කූඩයක් තැබුවා
කුරුසිය මුල.
යේසුගේ රුධිරයෙන් ලේ රතු වුණු
බිත්තර කූඩයත් රැගෙන
පිවිතුරු කන්‍යාවද
නම් දැරූ වෙසඟනද 
ගියා තිබේරියස් අධිරාජයා වෙත.
යේසුස් යළි නැගී සිටිතැයි බියෙන්
ඒ බිජුවට අතරින්
සලිත වූවා අදිරද.

සුණු විසුණු වූ නටඹුන් මැද
ශාන්ත අන්තෝනි පිළිමය අභියස
රෝල්වී ගියා කාසියක්
ලේ තැවරුණු.
එස්තර ඉරිදා බිත්තර පාට කළ පුංචි කෙල්ලගේද
යේසුස්ගේද රුධිරය
පාවුළු ඝාතනය කළ කිතුනුවන්ගේද රුධිරය
කුරුස යුද්ධයේ හළ රුධිරය මතු නොව 
බොහෝ ලේ තැවරී තිබුණා එහි.

යුදෙව්වන්ගේ ලේද
මුසල්මානුවන්ගේ ලේද
සිහලුන්ගේ ලේද
දෙමලුන්ගේ ලේද
වෙනසක් නැතිව උරා බිව්
ලේ සල්ලි,
මායාකාරියන් දඩයමේ
වධක කුටිවල හළ
මායාකාරියන්ගේ ලේද.

ඒ ලේ සල්ලිය
රෝල්වී යනවා 
ලෝකය පුරා
ඉතිහාසය පුරා
බිම දිගේ නොව දැන් ඒ
පියාඹනවා අහසේ

කාලයද අවකාශයද වගක් නැති
ලේ සල්ලි
ජාතියක් නැති
ආගමක් නැති
ලේ සල්ලි
කච්ජපුටගේ අතින් ඉල්ලිසට
මට්ට කුණ්ඩලී අතින් ෂයිලොක්ට
ෂයිලොක් අතින් නෙයිනා තම්බිට.

මේ පාවෙන හිම කුට්ටිය පිට
බුදුන් අදහන
බිල්ගේට්ස්ගේද සකර්බර්ග්ගේද පුක යට
සුදු පාට හිම පොත්ත යට
දිය යට ඇති සියල්ලම ලේ සල්ලිය.
සිරියානු දේශනාකාර නෙසේටෝරියස් අතින්
නෙස්ටෝරියන් කුරුසිය රැගෙන
තෝමස් ආවා සීගිරි ගල මුදුනට
යේසුස් කුරුසියේ ගැසු සේම 
ධාතුසේනව මැටි ගැසුවා.
සීගිරි කුරුස කාසිවල 
බලව මේ ඇත්තේ 
කාශ්‍යපගේ රුධිරයය.
මේ පෙරළී එන පෙරළී යන කාසියට
ඉතිහාසය පුරා
ලෝකය පුරා
නමක් නැත.
ඒ රන්මසුවත්
මාක්වත්
රූබල්වත්
රුපියල්වත්
පවුම්වත්
ඩොලර්වත්
ඩිනාර්වත්
යෙන්වත් නොවේ
ඒ ලේ සල්ලිය.

පුන්තිලා කෑ ගැසුවා
“හොඳට මතක තියාගනින් මත්ති, සල්ලි පිලී ගඳයි.”

ඉතින් මේ කාසියට නමක් නැත
ලේ සල්ලි කියා මිස නමක් නැත.

පාහියන් එන විට සේද මාවතේ
දළඹුවෝත් ආවා

-->

Here we go round the mulberry bush,
The mulberry bush,
The mulberry bush.
Here we go round the mulberry bush

මකරුන් ද ආවා.
මෝසම් දෙකටම මැදි වුණ 
සෙරන්ඩිබයේ කරුමය
නානාදේසී සමාගම තිබුවත්
නානා දේසීන් ඇලජික්
කුවේණිගේ සාපය.

යහපත් නාවික 
ලොරන්සෝද අල්මේදාට බොහෝ කලකට පෙර
ද්වාලාවත් වය වයා 
සබරගමුවෙන් සිරිපා මුදුනට නැග්ග
පන්සලටම සින්න කළ දවුල හේවිසියට
සින්බෑඞ්ද සෙයිලර්

දකුණු සිරිපතුල මක්කම වැල්ලේයා

මණිබඩු රැගෙන ගමට ආ 
කදා වළල්ලට ඔමරි පා
අමුතු බත් දුන් කෙල්ලන් සමග බින්න බට
සින්බෑඞ්ද සෙයිලර්.
අමුතු බත් දීම අත ඇල්ලුමෙන් දැන ගත් 
සින්බෑඞ්ද සෙයිලර්.

කුරුස යුද්ධය ඇරඹිණි
ඉන්දියාව සොයා කොලම්බස්
බට-ඉර දෙසට නික්මිණි.
යුදෙව් සංහාරයේ ලේ සල්ලි මතුයේ
මායාකාරියන්ගේ ලේ සල්ලි මතුයේ
කුමාරයෝද, පූජකයෝද
විනිසුරෝද
විද්‍යාඥයෝ හා චින්තකයෝද
නාරි වෛද්‍යවරුද සව්දිය පිරූහ.

මායාකාරියන් ඝාතනය කළ
වධක කුටි තුළ
යක්ෂයාගේ සළකුණ සොය සොයා
කපා කොටා සාරා සිදුරු කළ
ස්ත්‍රී මළ සිරුරු අතරේ
මැතියෝ කලම්බෝ සොයා ගන්නා විට ක්ලිටෝරසය
ඔහු දිව තබන විට එහි තුඩුවට
කොළම්බස් පා තැබුවා සුභ පැත්මේ තුඩුවට,
මායාකාරියන් වනසා
විද්‍යාඥයෝ සිදුරු කොට මහ පොළෝ මාතාව
ගයියාව
දූෂණය කරන අතරේ.

One little, two little, three little Indians
Four little, five little, six little Indians
Seven little, eight little, nine little Indians
Ten little Indian boys.

-->

Ten little, nine little, eight little Indians
Seven little, six little, five little Indians
Four little, three little, two little Indians
One little Indian boy.

නාභිය නොදක්වා
සළු ඇඳ බොලට දක්වා 
සිනා නොම සෙන දසන් දක්වා
විශාඛාව
කොලම්බස්ගේ පිල්ලිය 
ඕල්කට් ඇවිදින් ගොඩ ගත්ත දැරහැව
වික්ටෝරියා රැජිනගේ අතීතයට යැවූ පිල්ලිය
සාන්ත දාන්ත තීන්ත කූඩුව
විශාඛාව
මායාකාරියන්ගේ කීතු කළ මාංශ මතින්
මායාකාරියන්ගේ දවා හළු කළ අළු මතින් උපන්
ගල් පෙරේතයන් සේ මුඩුම පිරිමින් සැමගේ සුරුවම
ගෙදර තියා ගත හැකි
මැස්සෙක් වහපු නැති
මෙලෝ රහක් නැති 
කිම්බේ සෙවල බිඳක් නැති
චාලිද්දරය හිස මුදුනේ තබා ගත්
පතිවත් පටි පැළඳූ 
ගෙවල ගැහැණිය
වික්ටෝරියාගේ පිල්ලය 
විශාඛාව

කොලම්බස්ගෙන් පසු
රන් උමතුවේ ලේ
අප්‍රිකාවේද ඔස්ටේ්‍රලියාවේද
ඇමරිකාවේද රන්වල ලේ උකහා ගත්
රන් සංචිතය...

දැන් රුපියල විතරක් නොව ඩොලරයද අහසේ පාවෙයි
රන් සංචිතත් නෑ
කාසි කොල මුකුත් නෑ
ඉලක්කම් විතරයි
ඒත් ඒ ඉලක්කං
ලේ ගඳයි 
හරිම පිලී ගඳයි
ඉතින් මේ ඉලක්කං එහෙ මෙහෙ කළ යුතුයි
ඉලක්කං සෙල්ලමට ජීවිත පරදු වෙයි

වයිරස් ගාඞ් විකුණන්නට වයිරස් හදන
ආයුධ විකුණන්නට භීතිය හදන ලෝකයක
නයාට අඳු කොළ මෙන් උනුන් පෙනෙන
ත්‍රස්තයන් දෙදෙනාම
අතරමැදියාද
තුන්වැනියාද
සංහිඳියාකාරයාද 
මානව හිමිකම්කාරයා මෙන්ම
ඒ හිමිකම් වනසන්නාද
සියල්ලෝ එක තැනින් පඩි ලබති

වැටත් නියරත් ගොයම් කෑ දේශයේ
කාගෙ කාගෙත් කිල්ලෝටවල ඇති හුණු අමතක කොට
සාමා අමර එන්න අපි
මුව හමට තඩි බාමු
මුං වපුරා තල ඉල්ලමු
අමු කැවුණු විට මෝටම...
දස මාසේ උරේ කත්වා
දුටු දුටු තම්බි මරන් කත්වා
සියලු සත්වයෝ නිදුක් වෙත්වා
සියලු තම්බින් තුරන් වෙත්වා
ඔන්න නයා
මෙන්න පොල්ල
මං නං සිල්

එන්න අපි හාමු මේ කෙතේ
මඩවමු පාග පාගා
අපිම මැඩවෙමු.
සකසමු පොළව වපුරන්නට
ගොජර මජිරි තුන්හිරිය
බැවින ඒ අප දිව බොජුන්.
පුටින්ගේද, ට්‍රම්ප්ගේද තුරුම්පුවට
එන්න අපි ඔට්ටු අල්ලමු.
බලු බෙට්ටේ ඒ කොනත්
මේ කොනත් දෙකම ගඳ වුව
මේ කොන සුවඳ යැයි ශපථ කරමු
අපි බෙට්ට මත ඇති රුපියල දිවෙන් ගමු
‘බුර්කාව තහනම්ය.
ස්ත්‍රී විමුක්තියේ දෝංකාරයය.’ 

යකඩ මල්ලට ගුල්ලො ගැසූ විට 
හාල් මල්ල ගැන මොන කතා වුව
එන්ජෝයිකාරයෝ නරකයි
බොදු එන්ජෝයි නම් කදිමයි
රජය නම් හරි හොඳාාායි
විපක්සේ තව හොන්ඳායි
හබන් කුකුලෝ මගුල් කයි
උගුඩුවෝ තටමයි

සක්‍ර යැයි සුපතල 
හක්‍ර දෙවිඳුන් වූ
බුදුන් සරණ ගිය
ඬේරියස් අදිරදුනි
ඒ ධර්ම රාජ්‍යය රැකගන්න
ගල් ගසා මරන්නට පැන වූ ඔබේ නීතියට
වූයේ මේ කිමැයි

“ධර්මය රකින්නට යන්නා ධර්මය විනාශ කරනු ලබන්නේය.”

මහම්මද් නබිතුමනි
සම්මා සම්බුදුනි
යේසු සමිඳාණනි
මේ බෙට්ටෙ කොයි කොණත් ගඳයි.

බල්ලෙක් සිටී ඔලු තුනක් ඇති
එක පුකක් ඇති
එකම බෙට්ටට තමන්ගේ කියා රංඩු වෙයි
ඒත් උන්
මේ වසුරු ඔබලාගෙයි උඩු බුරයි.
උඩු බිරුම් හඬ මැදින්
යේසුස් පාවා දුන් රිදී කාසිවල
සිනා හඬ නැගී එයි.
යුදෙව්වන්ගේ 
මායාකාරියන්ගේ අඳෝනා
රතු ඉන්දියානුවන්ගේ
හා නෙක නෙක ජාති මතු නොව
චීනයේද රුසියාවේද
කොමියුනිස්ට් වධ කුටිවල 
මිනිසුන් නැගූ අඳෝනා
ඒ මැදින් නැගී එයි
බලු බෙට්ටෙ කොයි කොණත් ගඳයි.

මේ මාගේ මවය පියාය
පුතුය දියණියය
පෙම්වතියය පෙම්වතාය
බිරියය සැමියාය
සොයුරියය සොයුරාය වෙනසක් නැතිව
ඉණ ඉහ කිරිපල්ල අතගා ගෙට ගන්න
දිනක් ළඟ ළඟම එයි.

ආයුධ වෙළෙන්දන්ගෙන් යැපෙන
පූජකයෝද
නායකයෝද
වෙන්ඩ නායකයෝද
හිටපු නායකයෝද
අන් සියලු වෙළෙන්දෝද
පිටපොට ගසති.

“ලෝකය රඟ මඩලකි
අපි එහි රඟන නළුවෝ වෙමු.”

පිටපත නොදනිතත්
පුහුණු කළ වග නොදනිතත්
එවලෙට හිටිවන රඟන
අපගේම මෝහයෙන් ක්‍රමලේඛ ගත කළ 
රොබෝ නළු නිළියො අපි.

කේ. කේ. සමන් කුමාර